مسابقة اجمل طبق على الفيس بوك للاسبوع الحادى عشر

 

نتيجة مسابقة الاسبوع الحادى عشر من مسابقة اجمل طبق على الفيس بوك 

وفاز به كل من:-

شيرين الطوخى عن الطبق الاول بريانى الدجاج

ايمان منسى عن الطبق الثانى  المصفوفة

شيرين الطوخى عن الطبق الثالث تورتة بلاك فورست

الف مبروك للفائزين 

 

الطبق الاول بريانى الدجاج 

 وفاز به شيرين الطوخى الف مبروك شيرين

 بريانى الدجاج
بسم الله .... الأرز البريانى

المقادير : 

فراخ انا استخدمت الصدور
 - بسله -جزر- بصله متوسطه
-فصين توم -جنزبيل طازج مفروم 
 -قرفه خشب قرنفل حبهان معلقه صغيره كارى 
ومعلقه صغيره كركم ورق لورى كسبره 
 وكمون ملح وفلفل وليمون ناشف

الطريقه :

 نقطع البصل صغير ونشوح البصل والزنجبيل الطازج والتوم فى شوية زيت ونحط كل من القرفه الخشب والقرنفل والحبهان و ورق اللورى ونشوح لحد ما الريجحه تطلع وبعدين نحط الصدور هتعمل تش تش هههههه ونقلب كويس بس نخلى بالنا علشان مش نحرق البصل هنلاقى الريحه بقت فظيعه نحط التوابل البودره اللى هيه الكمون والكسبره والكارى والكركم ونقلب وبعدين نضيف البسله والجزر والليمون الناشف والطماطم المقطعه صغير تقريبا اتنين وسط ونوطى النار لحد ماتشرب الميه اللى هتنزل من الفراخ والخضار ونتابع لو احتاجت ميه نزود وبعد ما نطمن ان الفراخ استوت نرفعها من الحله ونجيب الرز البسمتى نغسله كويس ونحطه على الصوص اللى نزل من الفراخ ونظبط الملح واول ما الرز يغلى شويه نوطى النار ونحط الفراخ على الوش ونسيبه يتشرب واوعى تقلبى الرز ولما الرز يستوى تطفى وتسيبه 10 دقايق وبعدين تغرفى وبالهنا والشفا وطبعا تشيلى اليمون والقرفه والحاجات دى

 الطبق الثانى المصفوفة

فاز به ايمان منسى الف مبروك ايمان

المصفوفة على طريقتى

المقادير
2 حبة جزر مقطعة شرائح
2 حبة بطاطس مقطعة شرائح
2 حبة بيض مسلوق مقطعة شرائح
2 حبة فلفل رومى مقطعة شرائح
بصلة مفرومة
نصف كيلو لحمة مفرومة
ملح وفلفل وبهارات للتتبيل

الطريقة
نشوح الجزر والبطاطس والفلفل في قليل من الزبده
نخلط كل من البصل واللحمة والبهار جيدا
نحضر قالب كيك مستطيل ونرص به الخضار بالتبادل مع اللحمة ( في القاع نضع الفلفل ثم اللحم ثم البطاطس ثم اللحم ثم البيض وبعده اللحم واخيرا الجزر ثم اللحم ونضعها في فرن متوسط الى حامى حتى تمام النضج

الطبق الثالث وفاز به شيرين الطوخى تورتة بلاك فورست

تورتة البلاك فورست
بسم الله 

المقادير:

اولا الكيك الأسفنجى : 

5 بيضات ولو البيض صغير يبقى 6

كوب الا ربع سكر بودره

كوب وربع دقيق

معلقة بيكنج بودر

فانيليا

1/2 معلقه صغيره محسن كيك ان وجد

بودرة كاكاو

قالب شيكولاته خام

كريم شانتى

كمبوت كريز وياريت تجيبوه كمبوت علشان المسكر ده بيبقى طعمه مش قد كده ولو مش عايزه ممكن فراوله

الطريقه

تضربى البيض كويييييييييييس وتضيفى السكر شويه شويه لحد ما يتكون عند خليط فاتح كريمى تقريبا تضربى لمده 25 دقيقه وفى أخر 3 دقايق ضيفى المحسن مش تزهقى الموضوع يستاهل

وبعدين تنخلى الدقيق كويس وطبعا احنا عملناه شيكولاته يبقى تشيلى معلقتين دقيق وتحطى مكانهم بودرة كاكاو

وتضيفى البيكنج بودر وتنخليه مع الدقيق والكاكاوالمهم الخطوه الجايه تضيفى الدقيق بالراحه على البيض وياريت بمعلقه مسطحه او اسبتيولا وبالراحه جدا ضيفى شويه شويه لحد ما الدقيق يختفى طبعا تجهزى الفرن على درجة حراره 180 -200 على حسب فرنك وتبطنى الصينيه مقاس 26 بالزبده وورق الزبده وتصبى الخليط بالراحه وتحطيه فى الفرن وياريت لو تقفلى باب الفرن بهدوء واوعى تقفلى الباب جامد علشان الكيك مش يتهز ويطلع الهوا منها

اوعى تفتحى عليها قبل 30 دقيقه

وبعد ما تستوى تقليبهاعلى منخل سلك ومش تسيبيها فى الصينيه علشان البخار مش يخليها تكش وتبوظ وتسيبيها تبرد تماما قبل ما تذوقيها

جهزى الكريم شانتى بالطريقه المكتوبه على الكيس انا بستعمل السايب

قطعى الكيك ثلاث شرايح و حطى أول شريحه على الطبق اللى هتزوقى فيه واسقيه انا بسقى الكيك كاكاو باللبن

وبعدين طبقه كريم شانتى وبعدين كيك وتسقى وبعدين كريم شانتى وبعدين اخر طبقه وتسقيها و بعد كده تغطى الكيك بالكريم شانتى كويس

تبشرى الشيكولاته بالمبشره لو عايزاها ناعمه وبالسكينه لو بتحبيها شرايح غطى الكيك بالشيكولاته واعملى وردات بالكريم شانتى وضيفى الكريز وممكن فراوله لو مش بتحبى الكريز

وياريت تسيبى التورته فى التلاجه شويه علشان تشرب من بعضها

ممكن تحطى مع الحشو كمبوت او مكسرات وطبعا ده حسب الرغبه

الف مبروك للفائزين وتمنياتنا لكم بالتوفيق

مع تحيات الادمن سوزان مقاوى

 

Posted in: مسابقة اجمل طبق على الفيس بوك